Rusiye uquqiy aktlar portalında Rusiye Federatsiyası ükümetiniñ askerlikke mecbur olğanlarnıñ yekâne cedveli qararınıñ metni peyda oldı. Qarar aprelniñ 19-nda qabul etildi. Oña binaen, 2024 senesi noyabrniñ 1-nden başlap Rusiyeniñ askerlikke mecbur olğan vatandaşları içün celpnameler ve diger haberler elektron şeklinde yollanacaq.
Elektron cedvelde arbiy cedvel ve vatandaşlar aqqında malümat olacaq, hususan celpnameler aqqında da haber etilecek. Vatandaşlarnıñ bu cedvelde "şahsiy odası" olacaq.
Rusiye Mudafaa nazirliginden ğayrı, cedvelni FSB ve diger mahsus hızmetler körecek. Cedvelde vatandaşlar aqqında malümatnı bergi hızmetleri ve iş adamları ve mulk kelişmelerini yapqan organlar berecek.
"Arbiy advokatlar" aq qorçalayıcı kanalı bildirgenine köre, elektron cedvelde derc etilgen celpname yedi künden soñ yetkizildi dep sayılacaq. Bıltır yazda kirsetilgen deñişmelerge köre, askerlikke mecbur olğan vatandaşlarnıñ celpnameleri derc etilgen soñ Rusiye Federatsiyasından çıqışları yasaqlana.
Şimdi bu şart yerine ketirilmey, çünki arbiy komissarlıq ve sıñır hızmeti malümatnı özara doğrudan paylaşmay. Elektron cedvel çalışıp başlağan soñ celp etilgenler memleketni terk etip olamaz, çetel pasportlarını da alamaz.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
